Fréttir og tilkynningar

Byggðasafn Vestfjarða og SARPUR

Finney Rakel Árnadóttir

mánudagurinn 25. maí 2020

Byggðasafn Vestfjarða er eitt af aðildasöfnum SARPS sem er menningarsögulegt gagnasafn á netinu. Í Sarpi eru eru varðveittar upplýsingar um listaverk, muni, myndir, fornleifar, hús, þjóðhætti og örnefnalýsingar ásamt öðru efni. Byggðasafnið hefur lagt áherslu á að safna gripum sem tengjast atvinnu og byggðasögu norðanverðra Vestfjarða, gjarnan gripum sem tengjast sjávarútvegi og þá einnig gripum frá ýmsum tímabilum, allt til okkar tíma. Á safninu hefur verið unnið í áföngum eftir efni og aðstæðum að skrá aðföng inn á Sarp og má finna þá hluti hér Byggðasafn Vestfjarða/Sarpur en von er að öll aðföng og munir safnsins verði færðir inn á Sarp á næstu árum. 

Safnið hefur opnað eftir vetrarlokun.

Finney Rakel Árnadóttir

mánudagurinn 18. maí 2020

1 af 4

Safnið opnar í dag 18. maí og verður opið til ágústloka. Opnunartíminn er frá 9-17. Sólin hjálpar til að vanda og vekur umhverfi og menn til lífsins eftir vetrardvalann. Hvergi betra að vera í sólinni en í Neðsta. 

Alþjóðlegi safnadagurinn er í dag. Meðfylgjandi er umfjöllun í Fréttablaðinu um íslensku safnaverðlaunin 2020 en þau eru veitt íslensku safni fyrir framúrskarandi starfsemi. Þar er rætt við Margréti Hallgrímsdóttur þjóðminjavörð, Elsu Guðný Björgvinsdóttur, safnastjóra á Minjasafni Austurlands, Hilmar J. Malmquist forstöðumann Náttúrugripasafns Íslands, Ólöfu Kristínu Sigurðardóttur safnstjóra Listasafns Reykjavíkur og Guðbrand Benediktsson safnsstjóri Borgarsögusafns og þar með Sjóminjasafns Reykjavíkur en þar er tilnefnd grunnsýning safnsins Fiskur og fólk- sjósókn í 150 ár.

Hér viljum við nota tækifærið í tilefni dagsins og minna á báta safnins, Bátarnir í Neðsta mikilvægi þeirra og varðveislugildi.  #safnadagurinn#MuseumDay#IMD2020#Museums4Equality

 

Alþjóðlegi safnadagurinn 18. maí og ný Facebook síða

Finney Rakel Árnadóttir

föstudagurinn 15. maí 2020

Söfn eru jöfn 2020
Söfn eru jöfn 2020

Ný Facebook síða safnsins hefur litið dagsins ljós. Aðgangurinn að fyrri síðunni glataðist sem er amalegt í ljósi þeirra mynda og upplýsinga sem þar eru inni en þrátt fyrir ítrekaðar tilraunir á endurheimt reyndist það eina í stöðunni að stofna nýja síðu. Facebook síða Byggðasafns Vestfjarða

Alþjóðlegi safnadagurinn er þann 18. maí n.k. Að þessu sinni eru söfn hvött til þess að vera virk á samfélagsmiðlum, í hinum stafræna heimi og vekja þannig athygli á starfi safna samfélaginu til góðs. Markmiðið með alþjóðlega safnadeginum er að kynna og efla safnastarf í heiminum. Þemað í ár er “Söfn eru jöfn: Fjölbreytni og þátttaka allra 2020”

Byggðasafnið mun vera sýnilegt á nýrri Facebook síðu og miðla safnkosti sínum í tilefni dagsins. #safnadagurinn, #MuseumDay,  #IMD2020,  #Museums4Equality á Instagram, Twitter og Facebook.

Á heimasíðu FÍSOS stendur: 

Söfn um heim allan munu fagna Alþjóðlega safnadeginum þann 18. maí 2020 og dagana í kring með því að nota stafrænar lausnir vegna Covid19. Þátttaka í Alþjóðlega safnadeginum fer vaxandi meðal safna um heim allan. Árið 2019 tóku yfir 37.000 söfn þátt í atburðinum í 158 löndum.

Ýtum undir fjölbreytni og þátttöku allra í menningarstofnunum samfélagsins

Höfuðatriði samfélagslegs gildis safna er möguleikinn á því að bjóða fólki af ólíkum uppruna og með ólíkan bakgrunn að upplifa einstaka hluti. Söfn eru í senn virtar stofnanir og breytingaafl og nú er rétti tíminn til  að þau sýni fram á mikilvægi sitt með því að taka þátt í pólitískum, samfélagslegum og menningarlegum veruleika nútíma samfélags með uppbyggilegum hætti.

Þær áskoranir sem þátttaka fjölbreytts hóps hefur í för með sér og þeir erfiðleikar sem fylgja því að fjalla um flókin samfélagsleg málefni í umhverfi þar sem klofningur eykst stöðugt eru ekki bundin við söfn og menningarstofnanir eingöngu en skipta þessar stofnanir þó miklu máli þar sem þær eru í hávegum hafðar í samfélaginu.

Sívaxandi væntingar um samfélagslegar breytingar hafa drifið áfram umræðuna um möguleika safna á að vera jákvætt samfélagsafl með því að halda sýningar, ráðstefnur, gjörninga og standa fyrir fræðsludagskrám og framtaksverkefnum. Hins vegar er mikið óunnið í þá átt að sigrast á meðvituðum og ómeðvituðum breytum sem geta skapað ójöfnuð innan safna, og á milli safna og gesta þeirra.

Slíkur ójöfnuður getur tekið til margra atriða; til dæmis þjóðernis, kyns, kynhneigðar og kynvitundar, félagslegs bakgrunns, menntunarstigs, líkamlegrar getu, stjórnmálaskoðana og trúarbragða.

Undir yfirskriftinni „Söfn eru jöfn: Fjölbreytni og þátttaka allra“, leitast Alþjóðlegi safnadagurinn 2020 við að verða sameinandi afl sem í senn fagnar þeim ólíku sjónarmiðum sem finna má í samfélögum og starfsliði safna, og leitast við að koma auga á og sigrast á hvers konar slagsíðu í því sem sýnt er og þeim sögum sem þar eru sagðar.

Upp